საგანმანათლებლო და სოციალური პროექტები ახალგაზრდობისათვის

სამცხე-ჯავახეთის სოფლებში იგივე სოციალური და ეკონომიკური პრობლემებია, რაც საქართველოს ნებისმიერ სხვა კუთხის სოფლებში. სამწუხაროდ, სახელმწიფოს არა აქვს საშუალება გაუმკლავდეს ყველა იმ სოციალურ გამოწვევას, რომლის წინაშეც დგას ჩვენი მოსახლეობა, განსაკუთრებით სოფლებში.

ადიგენის მუნიციპალიტეტის სოფელ არალში, სადაც მოსახლეობის უმეტესი ნაწილი კათოლიკეა, იგივე პრობლემებია, რაც სხვა სოფლებში. წმ. იოსების ეკლესიის ვიკარიუსი, მამა მიხეილ სურმავა ახორციალებს საგანმანათლებლო და სოციალური პროექტების კოორდინაციას საქველმოქმედო ორგანიზაცია „კარიტასთან“ თანამშრომლობით. ჩვენ ვთხოვეთ მას მოეთხრო ამ პროექტების შესახებ:

„არალში უკვე მეოთხე წელია წმ. იოსების კათოლიკური მრევლისა და საქველმოქმედო ორგანიზაცია „კარიტასის“ თანამონაწილეობით ხორციალდება პროექტი “სარეაბილიტაციო ცენტრი ბავშვებისთვის და ახალგაზრდებისთვის“. ცენტრში ტარდება უფასო სასწავლო კურსები: მათემატიკა, კომპიუტერული უნარ-ჩვევები, თექა-გობელენები, ხატვა, ინგლისური ენა. 2013-2014 სასწავლო წელს ცენტრში 90 მოსწავლე ჩაირიცხა. გარდა ამისა, „საქართველოს კარიტასთან“ და „საქართველოში კამილიელთა ორდენთან“ გაფორმებული მემორანდუმის საფუძველზე, სოფ. არალში გაიხსნა კლასი ინვალიდი და შეზღუდული უნარების მქონე ბავშვებისთვის. სპეციფიკიდან გამომდინარე, ამ კლასში 7 ბავშვი სწავლობს. მომავალში იგეგმება სოფელ ბენარაში საბავშვო ბაღის აშენება, რომელიც მოემსახურება სამ სოფელს, სადაც არაა საბავშვო ბაღები.

შეიძლება დაისვას კითხვა, რას ემსახურება ეს პროექტები. პირველ რიგში ჩვენი პროექტები ემსახურება სოფლის ბავშვების და ახალგაზრდობის განათლებას, რომ მათ შეძლონ საკუთარი ნიჭის და უნარების განვითარება. ჩვენს დროში, როდესაც ახალგაზრდობა ძირითადად თავისუფალ დროს ქუჩაში, „ბირჟაზე“ ატარებს, სადაც მხოლოდ უარყოფითი გავლენის ქვეშ ექცევა, ეკონომიკური სიდუხჭირის გამო, ხშირად მშობლებს არა აქვთ საშუალება ბავშვები სხვადასხვა წრეებში მიიყვანონ, და ამით მოწყვიტონ ისინი ქუჩას. თანაც, სხვადასხვა საგანმანათლებლო დაწესებულებები მხოლოდ ახალციხეშია, რაც სოფლიდან 20 კილომეტრშია. ჩვენს ცენტრში ადამიანები კავდებიან, სწავლობენ და თავს გრძნობენ რეალიზებულად.

განსაკუთრებით მნიშვნელოვანია საზოგადოებაში ინვალიდების ინტეგრაციის საკითხი . ისინი როგორც წესი, არავის ახსოვს. ჩვენი ქვეყანა, სამწუხაროდ, ძალიან ცუდადაა მორგებული ინვალიდებისთვის. მათ კი ყურადღება სჭირდებათ, ისინიც ჩვენი საზოგადოების ნაწილი არიან. სამწუხაროდ, ჩვენთან მათზე ან კერძო პირები ზრუნავენ, ან უცხოური საქველმოქმედო ორგანიზაციები, განვითარებული ქვეყნებიდან, სადაც ინვალიდებს საზოგადოებაში საპატიო ადგილი უკავიათ.

ჩვენი პროექტის მიზანია ასევე ვაჩვენოთ ბავშვებს და ახალგაზრდებს, რომ კონფესიების სხვაობა არ უშლის ხელს ერთიანობას.”